IGT Halo Vizita Koordenasaun Servisu iha RAEOA-OECUSSE

Kategoria Notisia: Nasional

25 de Junho de 2025

Oecusse, 18 Juñu 2024

Inspesaun Jeral Traballu (IGT, sigla portugés), tersa-feira ne’e halao vizita ba iha IGT RAEOA-OECUSSE hodi koordena serbisu hotu iha area inspesaun nian. Iha loron hanesan, IGT mós halo enkontru ho Servisu Migrasaun Delegasaun Territorial RAEOA, iha eskritoriu Servisu Migrasaun RAEOA nian. Enkontru ne’e ho objetivu atu rona mekanismu ba prosesu atendementu ba emisaun vistu sira liu-liu vistu traballu iha RAEOA-OECUSSE.

Inspetur Jeral Traballu Sr. Frederico Pereira de Matos, iha ninia introdusaun hateten enkontru ida ne’e IGT hakarak atu rona mekanismu ba prosesu atendementu ba emisaun vistu traballu iha RAEOA-OECUSSE, hodi nune’e IGT bele entende mekanismu ba prosesu hirak ne’e ho diak. Superior ne’e salienta tan katak IGT sei konvoka reuniaun ho Diresaun Geral Servisu Migrasaun Dili hodi halo koordenasaun servisu diak liu tan iha futuru.

Sr. Matias Cab, hanesan Chefe Divisaun Operasaun Oecusse nian, esklarese katak Ministériu Interior liu husi Diresaun Jeral Servisu Migrasaun halo ona lansamentu iha loron 6 Juñu 2024 iha RAEOA-OECUSSE konaba sei halo prosesu no emite vistu sira iha embaixada no konsuladu RDTL iha estranjeiru no reativa atendementu iha RAEOA-OECUSSE hodi fasilita investor sira la presija ba to’o Dili hodi halo prosesu sira, maibe sei hein karta ofisial husi Diresaun Jeral Servisu Migrasaun Dili no prepara rekursu hodi halo servisu atendementu.

Depois halo vizita iha RAEOA-OECUSSE, ekipa IGT mós halo vizita ba konsuladu RDTL iha Atambua, hodi hasoru malu ho Sr. Bonifácio F. M. Belo, hanesan Konsuladu RDTL iha Atambua, Sra. Bendita de Araújo, hanesan Adida Servisu Migrasaun iha Atambua, no ekipa tomak hodi kria koordenasaun, partilla informasaun no ideia sira hodi bele iha atendementu ba prosesu sira relasiona ho emisaun vistu traballu nian nebe’e mak diak iha futuru.

(Media IGT)