Inspetur Jeral Traballu Partisipa iha Enkontru Mensál Instituisaun Tutelada iha MKAE

Kategoria Notisia: Nasional

8 de Julho de 2026

Dili, 3 Jullu 2026 Inspetur Jeral Traballu, Sr. Frederico Pereira de Matos, akompaña husi Diretora Nasionál Apoiu Tékniku IJT, Sra. Otilia Maria Pereira, no Asesora Sra. Maria Cortereal, partisipa iha enkontru mensál ho Instituisaun Públiku (IP) no Empreza Públika (EP) sira ne'ebé tutela husi Ministériu Koordenador Asuntu Ekonómiku (MKAE). Enkontru ne'e realiza iha Sala Enkontru Institutu Kualidade Timor-Leste (IKTL), Bebora, Díli. Enkontru ne'e diriji husi Koordenador Jerál MKAE, Sr. Jorge Rui Martins de Carvalho, ho objetivu atu apresente no avalia progresu servisu no ezekusaun Orsamentu Jerál Estadu (OJE) ba trimetre daruak no semestre dahuluk tinan 2026. Iha okaziaun ne'e, Inspetur Jeral Traballu apresente relatóriu kona-ba progresu servisu no ezekusaun OJE IJT durante semestre dahuluk tinan 2026. To'o agora, IJT halo ona vizita inspeksaun ba empreza hamutuk 568, ho total traballadór ne'ebé abranje hamutuk 8.935 ema. Husi inspeksaun hirak ne'e, IJT identifika violasaun ba Lei no lejislasaun iha área traballu nian iha balu husi empreza sira, no aplika multa ho montante total US$44.160,00, ne'ebé tama ba Kofre Estadu. Iha parte ezekusaun orsamentu, IJT konsege atinji 30% husi orsamentu alokadu ba tinan 2026. Enkontru ne'e mos hetan partisipasaun husi asesór, diretór no funsionáriu tékniku husi Empreza Públika (EP) no Instituisaun Públika (IP) sira ne'ebé tutela husi MKAE.