Inspesaun Jeral Traballu Partisipa Formasaun Jestaun Eskritóriu Ne'ebé fo husi INAP (Instituto Nacional da Administração Pública).

Kategoria Notisia: Notisia Rai Laran

8 de Julho de 2026

Dili, 3 Jullu 2026, Funsionáriu husi Inspesaun Jeral Traballu (IJT) hamutuk ema na'in 15 partisipa iha formasaun kona-ba Jestaun Eskritóriu, ne'ebé organiza husi Instituto Nasional Administrasaun Públika (INAP) durante loron lima, hahu husi 29 Juñu to'o 3 Jullu 2026. Formasaun ida-ne'e iha objetivu atu hasa'e kapasidade no kompeténsia funsionáriu sira iha área administrasaun no jestaun eskritóriu, hodi suporta prestasaun servisu públiku ne'ebé efisiente, organizadu no transparente. Durante formasaun, partisipante sira aprende kona-ba jestaun dokumentu no arkivu, organizasaun servisu administrativu, komunikasaun iha eskritóriu, étika profisionál, planeamentu servisu, no prátika di'ak sira iha jestaun eskritóriu. Sesaun sira hala'o liu husi aprezentasaun, diskusaun grupu no ezersísiu pratiku, ne'ebé fó oportunidade ba partisipante sira atu fahe esperiénsia no aumenta sira-nia koñesimentu. Partisipasaun funsionáriu IJT sira iha formasaun ida-ne'e hatudu komitmentu instituisaun nian atu kontinua dezenvolve rekursu umanu no hametin kapasidade funsionáriu sira, atu bele presta servisu ne'ebé ho kualidade aas ba traballadór, empregadór no públiku jerál. Liu husi formasaun ida-ne'e, espera katak partisipante sira bele aplika koñesimentu no abilidade ne'ebé hetan ona atu hadi'a efisiénsia, efetividade no kualidade servisu administrativu iha Inspesaun Jeral Traballu, nune'e kontribui ba prestasaun servisu públiku ne'ebé di'ak liu. Formasaun ne'e loke ofisialmente husi Inspetur Jeral Traballu, Sr. Frederico Pereira de Matos, no taka oficialmente husi Diretora Nasional Planeamentu no Apoiu Administrativu (DNPAA).